Segunda e a máis esperada proba desta edición do Trail Series despois do éxito de acollida do 2018 celebrada no mes de maio. Incorpórase ao circuíto porque así o demandaron os participantes: polo técnico do percorrido, pola variedade de terreos polos que se pasa, polo vertixinoso descenso dende o alto do monte Iroite, e por un senfín de motivos máis que nos trasladaste: XToSín Trail debería puntuar na seguinte edición dos Trail Series.

De novo saímos do centro da vila mariñeira de Portosín, que tan popular fixo o atletismo nos últimos tempos; pero o asfalto que imos pisar será de xeito testemuñal, pois enseguida nos metemos na praia e no mar, para aos poucos quilómetros da saída volver ao monte máis salvaxe e agreste cheo de regos, fragas, soutos, e sendeiros perdidos que atopamos para que os gocedes.

A chegada de novo ao casco urbano virá precedida dalgunha sorpresa antes de entrar na meta. A indescritible sensación de estar correndo pola praia e polo mar, e continuar por fragas e soutos durante case 15 km. deixamos que a sintades e a gocedes no XToSín Trail.